Ungdeild Söngskólans í Reykjavík er sívaxandi deild innan skólans. Aðsókn í deildina hefur sjaldan verið jafn mikil og fyrir komandi skólaár.
Nemendur deildanna sækja söngtíma, samsöng, tónfræði, tónheyrn og koma fram á tónleikum og/eða sýningum. Umsjón með deildinni hafa Harpa Harðardóttir, Sibylle Köll, Hólmfríður Sigurðardóttir og Sigurður Helgi Oddsson.
Nánar um Ungdeild Söngskólans, kennsluskrá og stundaskrá má finna hér.
Skólaveturinn 2017 – 2018
Nemendur Ungdeilda Söngskólans á nýliðnum vetri voru 28 talsins, á aldrinum 11 – 16 ára. Hópurinn var samheldinn, öflugur og bráðskemmtilegur.
Í desember sungu þau á jólatónleikum Eivarar Pálsdóttur í Hörpu. Það skapaðist góð stemning hjá Ungdeildinni, bæði í aðdraganda tónleikanna og á tónleikunum sjálfum. Vegna vinsælda þurfti að bæta við aukatónleikum, en samtals urðu tónleikarnir fimm talsins. Söngkennarar skólans æfðu hópinn vel svo þau gátu verið örugg með sig á sviðinu í Hörpu. Krakkarnir okkar vöktu mikla lukku og erum við að rifna úr stolti yfir þeim!
Á vordögum sýndi Ungdeildin Skilaboðaskjóðuna eftir Jóhann G. Jóhannsson við texta Þorvaldar Þorsteinssonar, í Iðnó, tvívegis fyrir troðfullum sal. Sibylle Köll leikstýrði þeim af sinni alkunnu snilld. Harpa Harðadóttir, Hólmfríður Sigurðardóttir og Sigurður Helgi Oddsson kenndu þeim tónlistina og raddþjálfuðu. Á æfingaferlinu kom Jóhann sjálfur reglulega til að leiðbeina hópnum, en það er ómetanlegt að fá leiðsögn beint frá tónskáldinu. Krakkarnir fóru á kostum í leik og söng.
Þrátt fyrir miklar tarnir í kringum tónleikana í Hörpu og uppsetningu Skilaboðaskjóðunnar var hvergi slakað á í náminu. Nemendur stunduðu söngtímana og hóptímana vel. Í lok skólavetrar, sýndu þau afrakstur vetrarins með einsöngstónleikum í Snorrabúð.
Þetta var s.s. viðburðaríkur skólavetur og gaman að sjá framfarir hjá þessum flotta hópi.
Við hlökkum til að taka á móti krökkunum aftur á komandi skólavetri og má búast við að hópurinn verði enn stærri. Einnig er ráðgert að lækka aldursmörk og taka einnig inn yngri nemendur; Yngri-Ungdeild!
