Söngur er ein helsta þjóðaríþrótt Íslendinga. Félag íslenskra kórstjóra hefur 230 kóra á skrá: 75 blandaða kóra, 44 barnakóra, 40 kvennakóra, 37 karlakóra og 35 kóra eldri borgara. Ætla má að starfandi kórar séu enn fleiri, á að giska 300, þar með taldir um 100 kirkjukórar. Það gerir einn kór á hverja þrettán hundruð íbúa. Miðað við 20 til 25 söngvara í hverjum kór að jafnaði, má gera ráð fyrir sex til sjö þúsund kórsöngvurum á Íslandi. Rannsóknir vísindamanna sýna að söngur eykur líkamlega vellíðan söngvarans með því meðal annars að framkalla sömu efni í heilanum og til dæmis súkkulaði og líkamsrækt. Rannsókn á 600 kórsöngvurum í Bretlandi sýnir að söngur bætir geðheilsuna líkt og holl hreyfing með því að örva heiladingulinn til að framleiða taugaboðefnið endorfín, öðru nafni innrænt morfín. Söngur styrkir einnig ónæmiskerfið samkvæmt niðurstöðum þýskra vísindamanna. Rannsókn félagsfræðinga í Ástralíu leiddi í ljós að kórsöngvarar eru jafnan ánægðari með lífið og tilveruna en annað fólk. Rannsókn á vistmönnum dvalarheimila aldraðra þar syðra leiddi í ljós að söngur dregur úr kvíða og þunglyndi. Söngurinn bætir einnig öndun, örvar blóðrásina, lækkar blóðþrýsting og léttir lund manna einnig með því móti. Einsöngur hefur einnig öll þessi áhrif á söngvarann líkt og kórsöngur en þó er einn munur á. Samsöngur er félagsathöfn í enn ríkari mæli en einsöngur. Félagsstarf kóra, samveran sjálf, er snar þáttur í ánægjunni sem söngvarinn hefur af söngnum. Rannsóknir benda til að þetta skýri að hluta hvers vegna kórsöngvarar njóta lífsins yfirleitt betur og sofa betur en annað fólk. Söngurinn eykur farsæld og lengir lífið. Tónlist kennir mönnum kurteisi. Þessi vitneskja kallar á eflingu söngnáms og sönglífs fyrir tilstilli almannavaldsins og einkaframtaks og einnig að heilbrigðisstofnanir ráði söngvara og aðra tónlistarmenn í þjónustu sína svo sem nú færist í vöxt. Og þá eru enn ótalin áhrif söngsins á áheyrendur. Hjörtu okkar flestra slá örar þegar við heyrum fallegan söng.