Bryndís Guðjónsdóttir lauk bakkalár- og meistaragráðu í óperusöng með láði frá Mozarteum-háskólanum í Salzburg í Austurríki. Að baki var framhaldspróf í söng frá Tónlistarskóla Kópavogs árið 2016 þar sem hún lærði hjá Önnu Júlíönu Sveinsdóttur og nám í Listaháskóla Íslands þar sem hún naut leiðsagnar Þóru Einarsdóttur, Kristins Sigmundssonar og Ólafar Kolbrúnar Harðardóttur.  Bryndís er handhafi nokkurra verðlauna. Árið 2022 vann hún fyrstu verðlaun og sérstök verðlaun í XVIII Certamen Nuevas Voces keppninni í Sevilla. 2021 hlaut hún fyrstu verðlaun í Riccardo Zandonai keppninni í Garda á Ítalíu. Hún var sigurvegari í keppni Ungra einleikara á Íslandi árið 2018 með Sinfóníuhljómsveit Íslands og þá sigraði hún í Dušek keppninni í Prag árið 2018.   Bryndís hefur komið fram á fjölum margra óperuhúsa og sungið með mörgum sinfóníuhljómsveitum. Þar má nefna Aalto Theater Essen, Semperoper Dresden, Theater Kiel, Theater Kassel, Liederhalle Stuttgart, Isarphilharmonie í Hamborg og Gasteig í München, Teatro de la Maestranza í Sevilla, Teatro Verdi í Martina Franca sem og í Salzburg, Prag, Róm, Vilnius, og Madrid. Meðal óperuhlutverka sem Bryndís hefur sungið opinberlega eru Ännchen í Freischütz eftir Weber, Fyrsta dama og Næturdrottningin í Töfraflautunni eftir Mozart, Erste Dienerin í Frau ohne Schatten eftir Richard Strauss, Kúnígúnd í Candide eftir Bernstein, Greifafrú í Gli Uccellatori eftir Florian Gassmann, Belinda í Dido og Aeneas eftir Purcell og Giulietta í Ævintýrum Hoffmanns eftir Jacques Offenbach. Þá er hún reglulegur gestur Fílharmóníuhljómsveitarinnar í Prag undir stjórn Heikos Mathias Förster.

Bryndís var tilnefnd sem söngvari ársins í flokknum sígildri og samtímatónlist 2024.

Bryndís var styrkþegi Tónlistarsjóðs Rótarý á Íslandi, Söngmenntasjóðs Marínós Péturssonar, Halldórs Hansen, Ingjaldssjóðs, Richard Wagners námsstyrkins og Gianna Szel í Austurríki.